കേരള-കർണാടക സംസ്ഥാനങ്ങളെ ബന്ധിപ്പിക്കുന്ന ബൈരക്കുപ്പ പാലം സേതുബന്ധൻ പദ്ധതിയിൽ ഉൾപ്പെടുത്തി നിർമിക്കുന്നതിന് കേന്ദ്ര സർക്കാരിന്റെ അനുമതി. കേന്ദ്ര റോഡ് ഇൻഫ്രാസ്ട്രക്ചർ ഫണ്ടിന് (സി.ആർ.ഐ .എഫ്.) കീഴിലുള്ള സേതുബന്ധൻ പദ്ധതിയിൽ ഉൾപ്പെടുത്തി, പാലം നിർമിക്കാൻ 27 കോടി രൂപയുടെ എസ്റ്റിമേറ്റിലാണ് കേന്ദ്രസർക്കാർ അനുമതി നൽകിയത്.
ബൈരക്കുപ്പ പാലം നിർമിക്കുന്നതിന് 40 കോടി രൂപയുടെ പദ്ധതിയാണ് കേരളം ആദ്യം സമർപ്പിച്ചിരുന്നത്. പിന്നീട് കേരള പൊതുമരാമത്ത് വകുപ്പ് ചീഫ് എൻജിനി യർ (ദേശീയപാത) കഴിഞ്ഞ മാസം പദ്ധതി പരിഷ്കരിച്ച്, 27 കോടി രൂപ ചെലവ് കണക്കാക്കിയുള്ള പുതുക്കിയ നിർദേശം സമർപ്പിച്ചു. ഇതിനാണിപ്പോൾ കേന്ദ്ര അനുമതി ലഭിച്ചിരിക്കുന്നത്. കേന്ദ്ര അനുമതിയുടെ അടിസ്ഥാനത്തിൽ ഇനി കേരളസർക്കാർ ഭരണാനുമതി നൽകണം. ഇതോടൊപ്പം പാലത്തിന്റെ ഇരുവശങ്ങളിലുമുള്ള അപ്രോച്ച് റോഡു കൾക്കാവശ്യമായ തടസ്സങ്ങളില്ലാത്ത ഭൂമി പ്രവൃത്തിക്ക് കരാർ നൽകുന്നതിന് മുൻപ് ലഭ്യമാക്കണം. ഭരണാനുമതി നൽകിയ തീയതി മുതൽ നാലുമാസത്തിനുള്ളിൽ സാങ്കേതിക അംഗീകാരവും സാമ്പത്തി കാനുമതിയും നൽകണം. ഭരണാനുമതി നൽകിയ തുകയെ ക്കാൾ പത്തുശതമാനത്തിൽ അധികമുള്ള ചെലവ് കേന്ദ്രപദ്ധതിയിൽനിന്ന് അനുവദിക്കില്ല. അധികച്ചെലവ് സംസ്ഥാന സർക്കാർതന്നെ വഹിക്കണം. മലയോര സംസ്ഥാനങ്ങൾ ഒഴികെയുള്ള സംസ്ഥാനങ്ങളിൽ പ്രവൃത്തി പൂർത്തിയാക്കാൻ പരമാവധി 24 മാസം അനുവദിച്ചിട്ടുണ്ട്.
ബൈരക്കുപ്പ പാലത്തിനായുള്ള കുടിയേറ്റ ജനതയുടെ 32 വർഷത്തെ കാത്തിരിപ്പാണിപ്പോൾ യാഥാർഥ്യത്തിലേ ക്ക് അടുക്കുന്നത്. മുള്ളൻകൊല്ലി ഗ്രാമപ്പഞ്ചായത്തിലെ പെരിക്കല്ലൂർ കടവിൽനിന്ന് തുടങ്ങി കബനിനദിക്ക് കുറുകേ കർണാടക ഗ്രാമമായ ബൈരക്കുപ്പയിലേക്ക് പാലം നിർമിക്കു ന്നതാണ് ഈ സ്വപ്ന പദ്ധതി. 1994 സെപ്റ്റംബർ 22-നാണ്
അന്നത്തെ കേരളമുഖ്യമന്ത്രി കെ. കരുണാകരനും കർണാടക മുഖ്യമന്ത്രി വീരപ്പമൊയ്ലിയും ചേർന്ന് ബൈരക്കുപ്പ പാലത്തിന് തറക്കല്ലിട്ടത്. പദ്ധതി പ്രവർത്തനങ്ങളുമായി ഏറെ മുന്നോട്ടുപോയെങ്കിലും കേന്ദ്ര വനം-പരിസ്ഥിതി മന്ത്രാലയത്തിന്റെ എതിർപ്പാണ് അന്ന് തിരിച്ചടിയായത്. ഇപ്പോൾ വീണ്ടും പാലത്തിനായുള്ള നടപടികൾ പുരോഗമിക്കുമ്പോഴും കേന്ദ്ര വനം-പരിസ്ഥിതി മന്ത്രാലയത്തിൻ്റെ അനുമതി ലഭിക്കുമോയെന്നതാണ് ഏവരും ഉറ്റു നോക്കുന്നത്. ബൈരക്കുപ്പ പാലം യാഥാർഥ്യമായാൽ അത് പുല്പള്ളി- മുള്ളൻകൊല്ലി മേഖലയുടെ സമഗ്രവികസനത്തിന് വഴിതുറക്കും.