ന്യൂഡൽഹി∙ നാളെ നടക്കാനിരിക്കുന്ന സിജെപി പ്രതിഷേധത്തിന് മുന്നോടിയായി ട്രെയിൻ സർവീസുകളും മെട്രോയും റദ്ദാക്കിയതിന് പിന്നാലെ പ്രധാനമന്ത്രി നരേന്ദ്രമോദിയെ വിമർശിച്ച് സിജെപി. മോദിയെ പരിഹസിച്ചു കൊണ്ട് അഭിജീത് ദീപ്കെയാണ് വിഡിയോ പങ്കുവച്ചത്. ഈ വിഡിയോയിൽ പാർട്ടി പ്രവർത്തകരായ സൗരഭ് ദാസും അശുതോഷ് റാങ്കയുമുണ്ട്. വിമാനത്താവളത്തിൽ നിന്നുള്ള വിഡിയോ ആണ് ദീപ്കെ പങ്കുവച്ചത്.
“ഇതാ നമ്മുടെ വിശ്വഗുരു. 56 ഇഞ്ചുകാരനായ മഹാനായ മനുഷ്യൻ റെയിൽവേ അടച്ചുപൂട്ടിയിരിക്കുന്നു. കാരണം നാളെ ഞങ്ങൾ പ്രതിഷേധിക്കാൻ പോവുകയാണ്”– ദീപ്കെ വിഡിയോയിൽ പറഞ്ഞു. വിഡിയോയിൽ ദീപ്കെ സൗരഭ് ദാസിന്റെ നേർക്ക് തിരിഞ്ഞ് ഈ സാഹചര്യത്തെക്കുറിച്ച് എന്തു പറയാനുണ്ടെന്ന് ചോദിക്കുന്നുണ്ട്. ‘‘മോദിജി ഉണ്ടാക്കുന്ന അന്തരീക്ഷം കൊള്ളാം. ഉഗ്രൻ’’ എന്നാണ് സൗരഭ് മറുപടി പറഞ്ഞത്.
അശുതോഷ് റാങ്കയും സംഭാഷണത്തിൽ പങ്കുചേരുന്നുണ്ട്. ‘‘മോദിജി, നിങ്ങളുടെ ആരോഗ്യത്തിന് കുഴപ്പമൊന്നുമില്ലല്ലോ?’’ എന്നാണ് അശുതോഷ് പറഞ്ഞത്. സമയാസമയങ്ങളിൽ രക്തസമ്മർദം പരിശോധിച്ചുകൊണ്ടിരിക്കണമെന്നും പിന്നാലെ ദീപ്കെ വിഡിയോയിൽ പറഞ്ഞു.
ഇന്ദിരാഗാന്ധിയുടെ അടിയന്തരാവസ്ഥക്കാലത്ത് പോലും ഇത്രയധികം അടച്ചുപൂട്ടിയിരുന്നില്ല. 57 മെട്രോ സ്റ്റേഷനുകൾ അടച്ചിരിക്കുന്നു. കേന്ദ്രസർക്കാർ ഡൽഹിയിൽ ബന്ദിന് ആഹ്വാനം ചെയ്തിരിക്കുകയാണെന്നാണ്’’ സൗരഭ് പിന്നാലെ പറഞ്ഞത്. “സാരമില്ല സാർ. നാളെ ഞങ്ങൾ വരുന്നുണ്ട്. ശരി, നാളെ കാണാം, ബൈ,” എന്ന് ദീപ്കെ പറയുന്നതോടെയാണ് വിഡിയോ അവസാനിക്കുന്നത്.
സിജെപിയുടെ പ്രതിഷേധത്തിന് മുന്നോടിയായി ഡൽഹിയിൽ കനത്ത സുരക്ഷയാണ് ഒരുക്കിയിരിക്കുന്നത്. 23,000 പൊലീസുകാരെ വിന്യസിച്ചിട്ടുണ്ട്. വിവിധ ട്രെയിനുകളും മെട്രോ സർവീസും റദ്ദാക്കിയിട്ടുണ്ട്. പ്രതിഷേധത്തിന് പൊലീസ് അനുമതി നൽകിയിട്ടില്ല.
