ന്യൂഡൽഹി: രാജ്യത്തെ ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യയിൽ (എസ്ബിഐ) ഗുരുതരമായ ഡാറ്റാ സുരക്ഷാ വീഴ്ചയുണ്ടായതായി റിപ്പോർട്ട്. ഏകദേശം 3.75 ലക്ഷം രേഖകൾ ഡാർക്ക് വെബിൽ പ്രത്യക്ഷപ്പെട്ടതിനെത്തുടർന്ന് നടത്തിയ പ്രാഥമിക പരിശോധനയിൽ 3,897 ഉപഭോക്താക്കളുടെ വ്യക്തിഗത വിവരങ്ങൾ കണ്ടെത്തിയതായി ബാങ്ക് അറിയിച്ചു. സംഭവത്തിൽ വിശദമായ സൈബർ സുരക്ഷാ അന്വേഷണം ആരംഭിച്ചിട്ടുണ്ട്. റിപ്പോർട്ട്
വ്യക്തിഗത വിവരങ്ങൾ ചോർന്നതായി കണ്ടെത്തൽ
ഉപഭോക്താക്കളുടെ പേരുകൾ, മൊബൈൽ നമ്പറുകൾ, ജനനത്തീയതികൾ, ഇ-മെയിൽ വിലാസങ്ങൾ, താമസസ്ഥലത്തെ വിലാസങ്ങൾ, ലിംഗവിവരങ്ങൾ എന്നിവ ഉൾപ്പെടുന്ന വിവരങ്ങളാണ് പുറത്തായ രേഖകളിൽ കണ്ടെത്തിയിട്ടുള്ളത്. ഇതിനു പുറമെ ബാങ്ക് ശാഖകളുമായി ബന്ധപ്പെട്ട വിവരങ്ങൾ, ഉപഭോക്തൃ തിരിച്ചറിയൽ നമ്പറായ സിഐഎഫ് (CIF), വായ്പാ അപേക്ഷകൾ, മറ്റ് വായ്പാ സംബന്ധമായ രേഖകളുടെ വിവരങ്ങൾ എന്നിവയും ഉൾപ്പെട്ടിട്ടുണ്ടെന്നാണ് റിപ്പോർട്ടുകൾ.
എന്നാൽ ഡാർക്ക് വെബിൽ കണ്ടെത്തിയ 3.75 ലക്ഷം രേഖകളും 3.75 ലക്ഷം വ്യത്യസ്ത ഉപഭോക്താക്കളുടേതാണെന്ന് സ്ഥിരീകരിച്ചിട്ടില്ല. പ്രാഥമിക പരിശോധനയിൽ വ്യക്തിഗത വിവരങ്ങളടങ്ങിയ 3,897 ഉപഭോക്തൃ രേഖകളാണ് തിരിച്ചറിഞ്ഞിട്ടുള്ളത്.
മുന്നറിയിപ്പ് ലഭിച്ചത് ഒക്ടോബർ 16ന്
തങ്ങളുടെ ത്രെറ്റ് ഇന്റലിജൻസ് സേവനദാതാവ്, ഡിഫൻസ് സൈബർ ഏജൻസി, ഇന്ത്യൻ കമ്പ്യൂട്ടർ എമർജൻസി റെസ്പോൺസ് ടീം (CERT-In) എന്നിവരിൽനിന്ന് ഒക്ടോബർ 16ന് വിവരങ്ങൾ ചോർന്നിരിക്കാമെന്ന മുന്നറിയിപ്പ് ലഭിച്ചതായി എസ്ബിഐ വ്യക്തമാക്കി.
തുടർന്ന് ബാങ്ക് സൈബർ സുരക്ഷാ നടപടികൾ സജീവമാക്കുകയും CERT-In അംഗീകാരമുള്ള സ്വതന്ത്ര സൈബർ സുരക്ഷാ ഏജൻസിയെ അന്വേഷണത്തിനായി നിയോഗിക്കുകയും ചെയ്തു. വിവരങ്ങൾ എവിടെനിന്നാണ് ചോർന്നത്, അവയുടെ ആധികാരികത എത്രത്തോളമുണ്ട്, ഉപഭോക്താക്കൾ നേരിടാനിടയുള്ള അപകടസാധ്യതകൾ എന്തൊക്കെയാണ് തുടങ്ങിയ കാര്യങ്ങളാണ് പ്രധാനമായും പരിശോധിക്കുന്നത്.
ബാങ്കിന്റെ പ്രവർത്തനങ്ങളെ ബാധിച്ചിട്ടില്ലെന്ന് എസ്ബിഐ
സംഭവം ബാങ്കിന്റെ പ്രധാന പ്രവർത്തനങ്ങളെയോ സാമ്പത്തിക പ്രകടനത്തെയോ പ്രവർത്തന തുടർച്ചയെയോ കാര്യമായി ബാധിച്ചിട്ടില്ലെന്നാണ് എസ്ബിഐയുടെ വിശദീകരണം. അതേസമയം, വിവരങ്ങൾ ചോർന്നതിന്റെ ഉറവിടവും വ്യാപ്തിയും സംബന്ധിച്ച അന്വേഷണം തുടരുകയാണ്.
സൈബർ തട്ടിപ്പിന് സാധ്യത; ജാഗ്രത വേണം
വ്യക്തിഗത വിവരങ്ങൾ ദുരുപയോഗം ചെയ്ത് ബാങ്ക് ഉദ്യോഗസ്ഥരെന്ന വ്യാജേന വിളിക്കാനും വ്യാജ സന്ദേശങ്ങൾ അയയ്ക്കാനും തട്ടിപ്പുകാർ ശ്രമിച്ചേക്കാമെന്ന ആശങ്കയുണ്ട്. കെവൈസി പുതുക്കൽ, അക്കൗണ്ട് ബ്ലോക്ക് ചെയ്യൽ, വായ്പാ നടപടികൾ തുടങ്ങിയവയുടെ പേരിൽ ഉപഭോക്താക്കളെ വിശ്വസിപ്പിച്ച് രഹസ്യവിവരങ്ങൾ കൈക്കലാക്കാൻ ശ്രമിക്കാം.
എന്നാൽ ഈ സംഭവത്തിൽ ബാങ്ക് അക്കൗണ്ടുകളുടെ പാസ്വേഡുകളോ എടിഎം പിൻ നമ്പറുകളോ ഒടിപികളോ ചോർന്നതായി ഇതുവരെ സ്ഥിരീകരിച്ചിട്ടില്ല. പണം നഷ്ടപ്പെട്ടതായും റിപ്പോർട്ടുകൾ സ്ഥിരീകരിക്കുന്നില്ല.
ഉപഭോക്താക്കൾ ഒടിപി, എടിഎം പിൻ, ഇന്റർനെറ്റ് ബാങ്കിങ് പാസ്വേഡ് എന്നിവ ആരുമായും പങ്കുവയ്ക്കരുത്. ബാങ്കിൽനിന്നാണെന്ന് അവകാശപ്പെട്ട് ലഭിക്കുന്ന സംശയാസ്പദമായ ഫോൺവിളികളും സന്ദേശങ്ങളും വിശ്വസിക്കുന്നതിന് മുമ്പ് ഔദ്യോഗിക മാർഗങ്ങളിലൂടെ പരിശോധിക്കണം. അനധികൃത ഇടപാടുകൾ ശ്രദ്ധയിൽപ്പെട്ടാൽ ഉടൻ ബാങ്കിനെ അറിയിക്കുകയും സൈബർ തട്ടിപ്പാണെന്ന് സംശയിക്കുന്ന സാഹചര്യത്തിൽ 1930 എന്ന ദേശീയ സൈബർ ക്രൈം ഹെൽപ്ലൈൻ നമ്പറിൽ ബന്ധപ്പെടുകയും വേണം.