സ്വന്തം പഞ്ചായത്തിലില്ല മരിച്ചവരുടെ കണക്ക്
വോട്ടർ പട്ടിക പുതുക്കാൻ തടസ്സമായി ജനന മരണ രജിസ്ട്രേഷനിലെ പോരായ്മ.
സ്വന്തം പരിധിയിലുള്ള കുടുംബങ്ങളിലെ ജനന, മരണങ്ങളുടെ പൂർണ്ണമായ കണക്ക് തദ്ദേശ സ്ഥാപനങ്ങളിലും ലഭ്യമല്ലാത്തത് പ്രതിസന്ധിയാകുന്നു. ജനനവും, മരണവും, നടക്കുന്ന സ്ഥലത്തെ തദ്ദേശ സ്ഥാപനത്തിൽ തന്നെ രജിസ്റ്റർ ചെയ്യണമെന്നാണ് ചട്ടം. പ്രമുഖ ആശുപത്രികൾ പ്രവർത്തിക്കുന്ന തദ്ദേശ സ്ഥാപനങ്ങളിലാണ് നിലവിൽ ഏറ്റവും കൂടുതൽ മരണം രജിസ്റ്റർ ചെയ്തിട്ടുള്ളത്. എന്നാൽ ഇതിൽ പലരും ആ തദ്ദേശ സ്ഥാപന പരിധിയിൽ ഉള്ളവരല്ല. സ്പെഷ്യൽ സമ്മറി റിവിഷന്റെ (SSR ) ഭാഗമായി വോട്ടർ പട്ടികയിൽ നിന്ന് പരേതരുടെ പേരുകൾ ഒഴിവാക്കാൻ തിരഞ്ഞെടുപ്പ് കമ്മീഷൻ വിവരങ്ങൾ തേടിയപ്പോഴാണ് ഈ രീതിയുടെ പോരായ്മ വ്യക്തമായത്.
ഈ കണക്കുകൾ ഉപയോഗിച്ച് വോട്ടർ പട്ടിക പുതുക്കുക അപ്രായോഗികമാണ്. ജനന - മരണ വിവരങ്ങൾ രജിസ്റ്റർ ചെയ്യുന്ന 'സേവന' പോർട്ടലിൽ വ്യക്തിയുടെ സ്വന്തം തദ്ദേശ സ്ഥാപനത്തിന്റെ പേര് കൂടി രേഖപ്പെടുത്താനും ആ വിവരം ബന്ധപ്പെട്ട തദ്ദേശസ്ഥാപനത്തിനു നേരിട്ട് കൈമാറാനും സൗകര്യമൊരുക്കിയാൽ മാത്രമേ ഈ പ്രശ്നത്തിന് പരിഹാരമാകൂ എന്ന് ഉദ്യോഗസ്ഥർ ചൂണ്ടിക്കാട്ടുന്നു.