കൊച്ചി: മലയാളത്തിന്റെ മെഗാസ്റ്റാർ മമ്മൂട്ടി ഇന്ന് 75-ാം പിറന്നാൾ ആഘോഷിക്കുന്നു. അഞ്ച് പതിറ്റാണ്ടിലേറെയായി മലയാള സിനിമയുടെ അഭിമാനമായി നിറഞ്ഞുനിൽക്കുന്ന മമ്മൂട്ടിക്ക് ആശംസകളുമായി സിനിമാ ലോകവും ആരാധകരും.
അഭിനയ മികവുകൊണ്ടും കഥാപാത്രങ്ങളുടെ വൈവിധ്യം കൊണ്ടും ഇന്ത്യൻ സിനിമയിൽ തന്നെ തന്റേതായ ഇടം നേടിയ താരമാണ് മമ്മൂട്ടി. നായകനായും സ്വഭാവനടനായും നെഗറ്റീവ് കഥാപാത്രങ്ങളിലുമെല്ലാം അസാധാരണമായ പ്രകടനങ്ങളാണ് അദ്ദേഹം കാഴ്ചവെച്ചത്.
ദേശീയ-സംസ്ഥാന ചലച്ചിത്ര പുരസ്കാരങ്ങൾ ഉൾപ്പെടെ നിരവധി അംഗീകാരങ്ങൾ സ്വന്തമാക്കിയ മമ്മൂട്ടി, മലയാള സിനിമയുടെ വളർച്ചയിലും വലിയ പങ്കുവഹിച്ചിട്ടുണ്ട്. പ്രായം കൂടുന്തോറും കൂടുതൽ ഊർജസ്വലമായ കഥാപാത്രങ്ങളുമായി പ്രേക്ഷകരെ വിസ്മയിപ്പിക്കുന്ന താരത്തിന്റെ പിറന്നാൾ മലയാളികൾക്ക് എന്നും ആഘോഷത്തിന്റെ ദിനമാണ്.
സിനിമാ മേഖലയിലെ സഹപ്രവർത്തകരും രാഷ്ട്രീയ-സാമൂഹിക രംഗത്തെ പ്രമുഖരും ആരാധകരും സോഷ്യൽ മീഡിയയിലൂടെ മമ്മൂട്ടിക്ക് ആശംസകൾ നേർന്നു. വിവിധ സ്ഥലങ്ങളിൽ ആരാധക കൂട്ടായ്മകളുടെ നേതൃത്വത്തിൽ പിറന്നാൾ ആഘോഷങ്ങളും ജീവകാരുണ്യ പ്രവർത്തനങ്ങളും സംഘടിപ്പിക്കുന്നുണ്ട്.
75-ാം വയസ്സിലും മലയാള സിനിമയുടെ യുവത്വമായി നിറഞ്ഞുനിൽക്കുന്ന മെഗാസ്റ്റാറിന് karimkunnam Media യുടെ ജന്മദിനാശംസകൾ..!
