കൽപ്പറ്റ: വയനാട് മീനങ്ങാടി ഹയർ സെക്കൻഡറി സ്കൂളിലെ വിനോദയാത്രയ്ക്കിടെ പ്രിൻസിപ്പൽ മദ്യപിച്ചെന്ന ആരോപണവും ഇതുമായി ബന്ധപ്പെട്ട തുടർനടപടികളും ചർച്ചയായിരുന്നു. ആരോപണവും പരാതിയും ഉയരുന്നതിന് പിന്നാലെ പ്രിൻസിപ്പൽ ഷിവി കൃഷ്ണനെതിരെ നടപടിയും വന്നിരുന്നു. എന്നാൽ ഇദ്ദേഹത്തെ സ്ഥലം മാറ്റിയ നടപടിക്കെതിരെ പ്രതിഷേധവുമായി എത്തിയിരിക്കുകയാണ് വിദ്യാർഥികൾ. മീനങ്ങാടി ഗവൺമെൻ്റ് ഹയർ സെക്കൻഡറി സ്കൂളിലെ വിദ്യാർഥികളാണ് പഠിപ്പ് മുടക്കി പ്രതിഷേധിക്കുന്നത്. വിനോദയാത്ര വിവാദവുമായി ബന്ധപ്പെട്ട് പ്രിൻസിപ്പലിനെ സ്ഥലം മാറ്റിയ നടപടിക്കെതിരെയാണ് കുട്ടികൾ രംഗത്തെത്തിയത്അതേസമയം, ഷിവി കൃഷ്ണനെതിരെ സ്ഥലം മാറ്റിയ നടപടിക്കെതിരെ കേരള സ്കൂൾ ടീച്ചേർസ് അസോസിയേഷന്റെ നേതൃത്വത്തിൽ ഇന്ന് മീനങ്ങാടിയിൽ പ്രതിഷേധ പ്രകടനവും വിശദീകരണ യോഗവും നടക്കും. ഇടതുപക്ഷ അധ്യാപക സംഘടന നേതാവാണ് പ്രിൻസിപ്പൽ ഷിവി കൃഷ്ണൻ. ആരോപണ വിധേയനായ പിടിഎ പ്രസിഡന്റ് ഹാജിസ് ഇന്ന് മാധ്യമങ്ങളെ കാണും. പിടിഎ പ്രസിഡന്റ് മദ്യപിച്ചു എന്ന കുട്ടികളുടെ ആരോപണത്തിൽ വിശദീകരണം നൽകുകയാണ് ലക്ഷ്യം. വിനോദ യാത്രയ്ക്കിടെ പ്രധാന അധ്യാപകനും പിടിഎ പ്രസിഡന്റും മദ്യപിച്ചു എന്നായിരുന്നു ഉയർന്ന ആരോപണം. എന്നാൽ പ്രിൻസിപ്പലിന്റെ രക്ത പരിശോധനയിൽ മദ്യത്തിന്റെ അംശം കണ്ടെത്താനായില്ല.
വിവാദങ്ങളെ തുടർന്ന് ഹയർ സെക്കന്ററി ബോർഡ് വിശദമായ അന്വേഷണം നടത്തി. അന്വേഷണത്തിൽ സർക്കാർ മാനദണ്ഡങ്ങൾ പാലിക്കാതെയാണ് സ്കൂൾ പഠന യാത്ര നടത്തിയത് എന്ന് കണ്ടെത്തിയതിനെ തുടർന്നാണ് പ്രിൻസിപ്പലിനെ അദ്ദേഹത്തിന്റെ വീടിന് അടുത്തുള്ള വടുവഞ്ചാൽ ഹയർ സെക്കന്ററി സ്കൂളിലേക്ക് സ്ഥലം മാറ്റിയത്.
തനിക്ക് എതിരെ വന്ന ആരോപണത്തിനും പരാതിക്കും പിന്നിൽ രാഷ്ട്രീയ മുതലെടുപ്പാണ് ഉണ്ടായതെന്നും, ഇതിനു പിന്നിൽ പിടിഎ തെരഞ്ഞെടുപ്പുമായി ബന്ധപ്പെട്ട ചില പ്രശ്നങ്ങൾ ആണെന്നും പ്രിൻസിപ്പൽ നേരത്തെ പ്രതികരിച്ചിരുന്നു . വിദ്യാർഥികളും ഇപ്പോൾ വലിയ പ്രയാസത്തിലാണ്. തനിക്കെതിരെ നടന്ന ഈ നീക്കങ്ങൾക്കെതിരെ നിയമപരമായ നടപടികളെക്കുറിച്ച് ആലോചിക്കുമെന്നും അദ്ദേഹം പറഞ്ഞിരുന്നു.
25നാണ് മീനങ്ങാടി ഹയർ സെക്കൻഡറി സ്കൂളിൽ നിന്ന് 135 വിദ്യാർഥികൾ ഹൈദരാബാദിലേക്ക് വിനോദയാത്ര പോയത്. യാത്ര കഴിഞ്ഞ് മടങ്ങുന്നതിനിടെ പ്രിൻസിപ്പലും പിടിഎ പ്രസിഡന്റും മദ്യപിച്ചെന്ന ആരോപണം വിദ്യാർഥികൾ ഉന്നയിക്കുകയായിരുന്നു. ഇതോടെ സംഭവം വലിയ വിവാദമായി.പ്രധാനാധ്യാപകന്റെ ഭാഗത്തുനിന്നുണ്ടായ ഗുരുതരമായ വീഴ്ചയ്ക്കെതിരെ നടപടി വേണമെന്നാവശ്യപ്പെട്ട് രക്ഷിതാക്കളും കെ.എസ്.യു, എസ്.എഫ്.ഐ, എം.എസ്.എഫ് ഉൾപ്പെടെയുള്ള വിദ്യാർഥി സംഘടനകളും രംഗത്തെത്തി. സ്കൂൾ ഓഫീസിന് മുന്നിൽ പ്രവർത്തകർ കടുത്ത മുദ്രാവാക്യം വിളികളോടെ പ്രതിഷേധിക്കുകയും പ്രിൻസിപ്പലിനെ തടഞ്ഞുവെക്കാൻ ശ്രമിക്കുകയും ചെയ്തു. എന്നാൽ പ്രിൻസിപ്പൽ മദ്യപിച്ചെന്ന പരാതിയുടെ അടിസ്ഥാനത്തിൽ നടത്തിയ രക്തപരിശോധനാഫലം നെഗറ്റീവ് ആയിരുന്നു. പ്രധാനാധ്യാപകന്റെ രക്തപരിശോധനയിൽ മദ്യത്തിന്റെ സാന്നിധ്യം കണ്ടെത്താൻ കഴിഞ്ഞില്ല