കൽപ്പറ്റ (വയനാട്): മുണ്ടക്കൈ–ചൂരൽമല ഉരുൾപൊട്ടൽ ദുരന്ത അതിജീവിതർക്കായി ഒരുങ്ങുന്ന മാതൃകാ പുനരധിവാസ ടൗൺഷിപ്പിൽ രണ്ടാംഘട്ടത്തിലുള്ള 149 വീടുകളുടെ നിർമ്മാണം അതിവേഗം പൂർത്തിയാകുന്നു ആദ്യഘട്ടത്തിൽ നിർമ്മാണം പൂർത്തിയായ 178 വീടുകൾ നേരത്തെ തന്നെ ഗുണഭോക്താക്കൾക്ക് കൈമാറിയിരുന്നു. രണ്ടാംഘട്ടത്തിലെ വീടുകൾ കൂടി സജ്ജമാകുന്നതോടെ ആകെ 327 കുടുംബങ്ങൾക്കാണ് ഇവിടെ സുരക്ഷിതമായ പുതുകിടപ്പാടം ഒരുങ്ങുന്നത്. ദുരന്തത്തിൽ സർവ്വതും നഷ്ടപ്പെട്ട ജനങ്ങൾക്ക് അന്തസ്സും സുരക്ഷിതവുമായ ജീവിതസാഹചര്യം ഉറപ്പാക്കാനുള്ള തീവ്രശ്രമത്തിലാണ് ഭരണകൂടം.
കുടുംബങ്ങൾക്ക് ആവശ്യമായ എല്ലാവിധ ആധുനിക അടിസ്ഥാന സൗകര്യങ്ങളും ഉൾക്കൊള്ളിച്ചുകൊണ്ടാണ് സമഗ്രമായ ടൗൺഷിപ്പ് വിഭാവനം ചെയ്തിരിക്കുന്നത്. അങ്കണവാടി, പ്രാഥമിക ആരോഗ്യ കേന്ദ്രം, കമ്മ്യൂണിറ്റി മാർക്കറ്റ്, പൊതു ശുചിമുറികൾ, മികച്ച നിലവാരത്തിലുള്ള റോഡുകൾ എന്നിവയുടെ നിർമ്മാണ പ്രവൃത്തികൾ യുദ്ധകാലാടിസ്ഥാനത്തിൽ പുരോഗമിക്കുകയാണ് ശേഷിക്കുന്ന പ്രവൃത്തികൾ കൂടി പൂർത്തിയാക്കി ഡിസംബറോടെ ടൗൺഷിപ്പ് പൂർണ്ണ സജ്ജമാക്കി നാടിന് സമർപ്പിക്കാനാണ് ലക്ഷ്യമിടുന്നത്.
പൂർണ്ണമായും പരിസ്ഥിതി സൗഹൃദമായ ഹരിത മാതൃകയിലാണ് ടൗൺഷിപ്പിന്റെ രൂപകൽപ്പന നിർവ്വഹിച്ചിരിക്കുന്നത്. ശാസ്ത്രീയ മാലിന്യ സംസ്കരണത്തിനായി എല്ലാ വീടുകളിലും ത്രീ-ലെയർ ബയോ കമ്പോസ്റ്റ് ബിന്നുകൾ ലഭ്യമാക്കിയിട്ടുണ്ട്. ഇതിനുപുറമെ, ഓരോ വീടിന്റെയും മേൽക്കൂരയിൽ 2 കിലോവാട്ട് ശേഷിയുള്ള റൂഫ്ടോപ്പ് സൗരോർജ്ജ പ്ലാന്റുകളും സ്ഥാപിച്ചിട്ടുണ്ട്. പൊതു ആവശ്യങ്ങൾക്കും സോളാർ എനർജി പ്രയോജനപ്പെടുത്തുന്നതോടെ ഊർജ്ജരംഗത്ത് പൂർണ്ണ സ്വയംപര്യാപ്തത കൈവരിക്കുന്ന ആദ്യ ദുരന്ത പുനരധിവാസ ഗ്രാമമായി ഈ ടൗൺഷിപ്പ് മാറും