തിരുവനന്തപുരം: സംസ്ഥാനത്ത് വർധിച്ചുവരുന്ന ഗാർഹിക പീഡനങ്ങൾ തടയുന്നതിനും അതിജീവിതകൾക്ക് സുരക്ഷയും നിയമപരമായ പിന്തുണയും ഉറപ്പാക്കുന്നതിനുമായി കേരള പൊലീസ് ‘സ്പീക്ക് അപ്പ്’ എന്ന പേരിൽ പ്രത്യേക ദൗത്യസേന രൂപീകരിച്ചു. ഐജി അജിത ബീഗം ഐപിഎസിനാണ് പദ്ധതിയുടെ ചുമതല.
ഗാർഹിക പീഡനത്തിന് ഇരയാകുന്ന സ്ത്രീകൾക്ക് ഭയമില്ലാതെ പരാതികൾ പങ്കുവയ്ക്കാനുള്ള സാഹചര്യം ഒരുക്കുകയാണ് പദ്ധതിയുടെ പ്രധാന ലക്ഷ്യങ്ങളിലൊന്ന്. പരാതി നൽകാൻ കഴിയാത്ത സാഹചര്യത്തിലുള്ളവരെയും കണ്ടെത്തി ആവശ്യമായ സഹായം ലഭ്യമാക്കുന്നതിനുള്ള സംവിധാനവും പദ്ധതിയുടെ ഭാഗമായി ഒരുക്കും. പരാതിക്കാരുടെ സ്വകാര്യതയ്ക്ക് പരമാവധി സംരക്ഷണം നൽകുമെന്നും അധികൃതർ വ്യക്തമാക്കി.
നിയമസഹായം, കൗൺസലിംഗ്, സുരക്ഷിത താമസം, ഉപജീവന സഹായം എന്നിവ ലഭ്യമാക്കുന്നതിനും ‘സ്പീക്ക് അപ്പ്’ ദൗത്യസേന ഇടപെടും. പരാതി എങ്ങനെ നൽകണം, ലഭ്യമായ നിയമപരമായ സഹായങ്ങൾ എന്തൊക്കെയാണ്, തുടർനടപടികൾ എങ്ങനെയാണ് എന്നിവ സംബന്ധിച്ച വ്യക്തമായ വിവരങ്ങളും പരാതിക്കാർക്ക് നൽകും.
ഗാർഹിക പീഡനവുമായി ബന്ധപ്പെട്ട വിവരങ്ങൾ പൊലീസ് സ്റ്റേഷനുകളിൽ നിന്ന് ശേഖരിച്ച് തുടർനടപടികൾ വേഗത്തിലാക്കുന്നതിനും വനിതാ പൊലീസ് ഉദ്യോഗസ്ഥർക്ക് പ്രത്യേക പരിശീലനം നൽകുന്നതിനും പദ്ധതിയിൽ നടപടികളുണ്ടാകും.
കഴിഞ്ഞ ഏഴ് വർഷത്തിനിടെ ഗാർഹിക പീഡനത്തെ തുടർന്ന് 92 സ്ത്രീകൾ മരിച്ചതായും, ഒരു വർഷത്തിനിടെ ഏകദേശം 15,000 പരാതികൾ പൊലീസിന് ലഭിച്ചതായും ആഭ്യന്തര വകുപ്പ് ചൂണ്ടിക്കാട്ടി. പരാതിപ്പെടാൻ കഴിയാതെ പീഡനം സഹിക്കുന്നവരുടെ എണ്ണം ഇതിലും കൂടുതലായിരിക്കാമെന്നും അധികൃതർ വ്യക്തമാക്കി.
“സഹിച്ചത് മതി, ഇനി തുറന്നു പറയാം” എന്ന സന്ദേശമാണ് ‘സ്പീക്ക് അപ്പ്’ മുന്നോട്ടുവയ്ക്കുന്നത്. ഗാർഹിക പീഡനത്തിനെതിരെ സ്ത്രീകൾ മൗനം പാലിക്കേണ്ടതില്ലെന്നും സഹായം തേടാൻ മുന്നോട്ടുവരണമെന്നും ആഭ്യന്തര വകുപ്പ് അറിയിച്ചു.
