പി.ജെ. ജോസഫിന് ക്യാബിനറ്റ് റാങ്ക്; കാർഷിക വികസന സമിതി ചെയർമാൻ സ്ഥാനത്തേക്ക് പരിഗണനയെന്ന് സൂചന
യുഡിഎഫിൽ ധാരണയായതായി റിപ്പോർട്ട്
തിരുവനന്തപുരം: കേരള കോൺഗ്രസ് (ജോസഫ്) വിഭാഗം ചെയർമാനും മുതിർന്ന യുഡിഎഫ് നേതാവുമായ പി.ജെ. ജോസഫിന് ക്യാബിനറ്റ് റാങ്കോടെ പുതിയ പദവി നൽകുന്നതുമായി ബന്ധപ്പെട്ട് യുഡിഎഫിൽ ധാരണയായതായി സൂചന. കാർഷിക വികസന സമിതി ചെയർമാൻ സ്ഥാനത്തേക്കാണ് അദ്ദേഹത്തെ പരിഗണിക്കുന്നതെന്നാണ് പുറത്തുവരുന്ന വിവരം.
നിയമസഭാ തെരഞ്ഞെടുപ്പിൽ മത്സരരംഗത്തുനിന്ന് മാറിനിന്ന പി.ജെ. ജോസഫിന് അർഹമായ സർക്കാർ പദവി നൽകണമെന്ന ആവശ്യം കേരള കോൺഗ്രസ് (ജോസഫ്) വിഭാഗം നേരത്തെ തന്നെ ഉന്നയിച്ചിരുന്നു. പാർട്ടി നേതാവും ജലവിഭവ മന്ത്രിയുമായ മോൻസ് ജോസഫ് ഇക്കാര്യം യുഡിഎഫ് നേതൃത്വത്തിന്റെ ശ്രദ്ധയിൽപ്പെടുത്തുകയും ചെയ്തിരുന്നു.
പി.ജെ. ജോസഫിന് ക്യാബിനറ്റ് റാങ്കിലുള്ള പദവി നൽകുന്നതിൽ ധാരണയിലെത്താൻ വൈകുന്നത് കേരള കോൺഗ്രസ് വിഭാഗത്തിനുള്ളിൽ അതൃപ്തിക്ക് കാരണമായിരുന്നു. മുന്നണിയിലെ അധികാരപങ്കിടലുമായി ബന്ധപ്പെട്ട ചർച്ചകളിലും വിഷയം സജീവമായി ഉയർന്നിരുന്നു.
പുതിയ തീരുമാനത്തോടെ കേരള കോൺഗ്രസ് (ജോസഫ്) വിഭാഗത്തിന്റെ ദീർഘകാല ആവശ്യത്തിന് പരിഹാരമാകുമെന്നാണ് വിലയിരുത്തൽ. ഔദ്യോഗിക പ്രഖ്യാപനം സംബന്ധിച്ച വിശദാംശങ്ങൾ പുറത്തുവരാനുണ്ട്.