ലോകബാങ്കിന്റെ സഹകരണത്തോടെ കൃഷി വകുപ്പ് നടപ്പിലാക്കി വരുന്ന കേര പദ്ധതിയുടെ ഭാഗമായി, റബ്ബർ പുനർനടീലിനുള്ള ഗ്രാന്റ് പദ്ധതി ഇടുക്കി ഉൾപ്പെടെയുള്ള എല്ലാ ജില്ലകളിലേക്കും കൂടി വ്യാപിപ്പിച്ച വിവരം ഇതിനകം അറിഞ്ഞിരിക്കുമല്ലോ. തൊടുപുഴ നിയോജകമണ്ഡലത്തിലെ റബ്ബർ കർഷകർക്ക് വലിയൊരാശ്വാസമാവുന്ന നടപടിയാണിത്. കാലാവസ്ഥാ പ്രതിരോധ ശേഷിയുള്ളതും അത്യുൽപ്പാദന ശേഷിയുള്ളതുമായ റബ്ബർ തൈകൾ വെച്ച് പിടിപ്പിക്കുന്നതിനായി കേര പദ്ധതി വഴി റബ്ബർ പുനർനടീലിന് ഹെക്ടറിന് ₹75,000 നിരക്കിൽ പരമാവധി ₹1.50 ലക്ഷം വരെ (രണ്ടു ഹെക്ടർ വരെ) ധനസഹായമാണ് അനുവദിക്കുക. ഈ വർഷം റബ്ബർ പുനർനടീൽ നടത്തിയ കർഷകർക്കും, അടുത്ത കാലയളവിൽ പുനർനടീൽ നടത്താൻ ഉദ്ദേശിക്കുന്ന കർഷകർക്കും ഈയവസരം പ്രയോജനപ്പെടുത്താവുന്നതാണ്.
റബ്ബർ കൃഷിയുടെ പുനരുജ്ജീവനത്തിനായി കേര പദ്ധതിയുടെ ഭാഗമായി നടപ്പാക്കുന്ന പദ്ധതിയിലേക്ക് കർഷകരിൽ നിന്ന് നേരിട്ട് അപേക്ഷകൾ സ്വീകരിക്കുന്നതിനായി ഒരു പ്രത്യേക അപേക്ഷാ ക്യാമ്പ് ഒക്ടോബർ 8 ന് വ്യാഴാഴ്ച രാവിലെ 10 മുതൽ തൊടുപുഴ KADS ഓഡിറ്റോറിയത്തിൽ വെച്ച് നടത്തുന്നതാണ്. ക്യാമ്പ് കേരളം ഗവ.ചീഫ് വിപ്പ് ശ്രീ. അപു ജോൺ ജോസഫ് ഉദ്‌ഘാടനം ചെയ്യും. പദ്ധതിയുടെ ആനുകൂല്യങ്ങൾ സംബന്ധിച്ച വിശദീകരണം, നിർബന്ധിത പരിശീലനം, അപേക്ഷ സമർപ്പിക്കുന്നതിനുള്ള സൗകര്യം എന്നിവ ക്യാമ്പിൽ ലഭ്യമാകും. നല്ല ഇനം റബ്ബർ തൈകൾ കുറഞ്ഞ ചെലവിൽ കർഷകർക്ക് ലഭ്യമാക്കുന്നതിന് ഓരോ നഴ്സറിക്കും പരമാവധി 6 ലക്ഷം രൂപ വരെ സബ്സിഡിയും കേര പദ്ധതി വഴി അനുവദിക്കും.
റബ്ബർ ബോർഡിന്റെ കൂടി സഹകരണത്തോടെ നടപ്പിലാക്കുന്ന ഈ പദ്ധതിയെക്കുറിച്ചുള്ള കൂടുതൽ വിവരങ്ങൾക്കും, അപേക്ഷാ നടപടികൾക്കുമായി കർഷകർ ഈ അവസരം പ്രയോജനപ്പെടുത്തണമെന്നും, പങ്കെടുക്കാൻ താല്പര്യമുള്ളവർ 9037824036 എന്ന നമ്പറിൽ ബന്ധപ്പെടണമെന്നും കേര പദ്ധതി ഈസ്റ് ആർ.പി.എം.യു. (കോട്ടയം) റീജിയണൽ പ്രൊജക്റ്റ് മാനേജ്മെൻറ് യൂണിറ്റ് അധികൃതർ അറിയിച്ചു. അപേക്ഷ നേരിട്ട് സമർപ്പിക്കുവാനുള്ള ലിങ്ക്: www.keraplantation.kerala.gov.in
ഈയവസരം പരമാവധി പ്രയോജനപ്പെടുത്താൻ എല്ലാ ഗുണഭോക്താക്കളും മുന്നോട്ടു വരണമെന്ന് സ്നേഹപൂർവ്വം അഭ്യർത്ഥിക്കുന്നു.
