ഇടുക്കി: വൈദ്യുതി മേഖലയുമായി ബന്ധപ്പെട്ട വിവിധ വിഷയങ്ങൾ ചർച്ച ചെയ്യുന്നതിനായി വൈദ്യുതി മന്ത്രി സണ്ണി ജോസഫിന്റെ അധ്യക്ഷതയിൽ കലക്ടറേറ്റിൽ കെ.എസ്.ഇ.ബി. ഉദ്യോഗസ്ഥരുടെ അവലോകന യോഗം ചേർന്നു.
വൈദ്യുതി ഉത്പാദനം, പ്രസരണം, വിതരണം എന്നീ മേഖലകളിൽ കൂടുതൽ ജനസൗഹൃദമായ ഇടപെടലുകൾ ഉറപ്പാക്കുമെന്ന് മന്ത്രി സണ്ണി ജോസഫ് പറഞ്ഞു. ഉപഭോക്താക്കൾക്ക് മികച്ച സേവനം ലഭ്യമാക്കുന്നതിനൊപ്പം വൈദ്യുതി മേഖലയിലെ അടിസ്ഥാന സൗകര്യങ്ങൾ ശക്തിപ്പെടുത്തുന്നതിനും ആവശ്യമായ നടപടികൾ സ്വീകരിക്കുമെന്നും മന്ത്രി വ്യക്തമാക്കി.
ഇടുക്കി ജില്ലയുടെ പ്രത്യേക സാഹചര്യങ്ങൾ കണക്കിലെടുത്ത് വൈദ്യുതി മേഖലയിലെ വിവിധ പദ്ധതികൾക്ക് കൂടുതൽ പരിഗണന നൽകുമെന്നും മന്ത്രി പറഞ്ഞു. ജില്ലയിൽ വൈദ്യുതി ഉത്പാദനവുമായി ബന്ധപ്പെട്ട സാധ്യതകൾ പ്രയോജനപ്പെടുത്തുന്നതിനൊപ്പം പ്രസരണ-വിതരണ ശൃംഖല കൂടുതൽ കാര്യക്ഷമമാക്കുന്നതിനുള്ള നടപടികളും ചർച്ചയായി.
ജില്ലയിലെ വൈദ്യുതി വിതരണവുമായി ബന്ധപ്പെട്ട പ്രശ്നങ്ങൾ, പുതിയ പദ്ധതികൾ, നിലവിലുള്ള പദ്ധതികളുടെ പുരോഗതി, പ്രസരണ ശൃംഖലയുടെ വികസനം, ഉപഭോക്താക്കൾ നേരിടുന്ന വിവിധ പ്രശ്നങ്ങൾ തുടങ്ങിയ വിഷയങ്ങളും യോഗത്തിൽ വിലയിരുത്തി.
കെ.എസ്.ഇ.ബി.യുടെ വിവിധ വിഭാഗങ്ങളിലെ ഉദ്യോഗസ്ഥർ യോഗത്തിൽ പങ്കെടുത്തു. ജില്ലയുടെ വൈദ്യുതി മേഖലയിലെ ആവശ്യങ്ങൾ കൃത്യമായി വിലയിരുത്തി സമയബന്ധിതമായി പരിഹാരം കാണുന്നതിനുള്ള നടപടികൾ സ്വീകരിക്കണമെന്ന് മന്ത്രി ഉദ്യോഗസ്ഥർക്ക് നിർദേശം നൽകി.
