ന്യൂഡൽഹി∙ കോക്രോച്ച് ജനതാ പാർട്ടി നാളെ നടത്താനിരിക്കുന്ന പ്രതിഷേധത്തിന് മുന്നോടിയായി തലസ്ഥാനത്ത് കേന്ദ്രം പ്രഖ്യാപിച്ച കടുത്ത നിയന്ത്രണങ്ങളിൽ വിമർശനവുമായി സുപ്രീം കോടതി. യാത്രക്കാരുടെ ബുദ്ധിമുട്ടുകളിൽ ആശങ്ക പ്രകടിപ്പിച്ച കോടതി, മെട്രോ സർവീസ് പൂർണമായി അടച്ചിടാൻ കഴിയില്ലെന്ന് വ്യക്തമാക്കി. അടച്ചിടുന്ന മെട്രോ സ്റ്റേഷനുകളുടെ എണ്ണം കുറയ്ക്കണമെന്നും നിർദേശിച്ചു.
സിപിഎം ജനറൽ സെക്രട്ടറി എം.എ.ബേബി നൽകിയ ഹർജി പരിഗണിക്കുമ്പോഴാണ് കോടതി ഈ നിരീക്ഷണങ്ങൾ നടത്തിയത്. മെട്രോ സ്റ്റേഷനുകൾ അടച്ചിടുന്നതിനും ട്രെയിനുകൾ റദ്ദാക്കുന്നതിനുമെതിരെയായിരുന്നു ഹർജി. ട്രെയിനുകളെല്ലാം റദ്ദാക്കിയെന്നും മെട്രോ സ്റ്റേഷനുകൾ അടച്ചിട്ടിരിക്കുകയാണെന്നും എം.എ. ബേബിക്കുവേണ്ടി ഹാജരായ അഭിഭാഷകൻ കപിൽ സിബൽ പറഞ്ഞു. ജനങ്ങൾക്ക് എങ്ങോട്ടും പോകാൻ കഴിയുന്നില്ല. സമാധാനപരമായ പ്രതിഷേധമാണ് നടക്കുന്നതെന്നും കപിൽ സിബൽ പറഞ്ഞു.
മെട്രോ സ്റ്റേഷനുകൾ പൂർണമായും അടച്ചിടുന്നതിൽ ആശങ്കയുണ്ടെന്ന് കോടതി പറഞ്ഞു. ഉപജീവനത്തിനായി ലക്ഷക്കണക്കിന് യാത്രക്കാരാണ് തലസ്ഥാനത്തേക്ക് ദിവസവും യാത്ര ചെയ്യുന്നതെന്ന് ചീഫ് ജസ്റ്റിസ് സൂര്യകാന്ത് സോളിസിറ്റർ ജനറൽ തുഷാർ മേത്തയോട് പറഞ്ഞു. നിയന്ത്രണം നടപ്പിലാക്കാൻ പൊലീസിന് അധികാരമുണ്ട്. എന്നാൽ എല്ലാം അടച്ചിടാനും ആളുകളെ ഗതാഗത മാർഗമില്ലാതെ ബുദ്ധിമുട്ടിക്കാനും കഴിയില്ല.. എല്ലാവർക്കും സ്വന്തമായി കാറില്ല. ആളുകൾ പൊതുഗതാഗതത്തെയാണ് ആശ്രയിക്കുന്നത്. പൂർണമായി അടച്ചിടുന്ന നടപടി പ്രായോഗികമല്ലെന്നും കോടതി പറഞ്ഞു. സർക്കാരുമായി ആലോചിക്കുമെന്നും നടപടികൾ സ്വീകരിക്കുമെന്നും സോളിസിറ്റർ ജനറൽ ഉറപ്പു നൽകി.
