ട്രെയിനിലെ ആർഎസി (Reservation Against Cancellation) സംവിധാനം നിർത്തലാക്കുന്ന കാര്യം പരിഗണിക്കുന്നു. തിരക്കുള്ള സമയങ്ങളിൽ ഒരു ബെർത്ത് രണ്ട് യാത്രക്കാർ പങ്കിടുന്നതിനെയാണ് ആർഎസി എന്ന് പറയുന്നത്. ഇങ്ങനെ യാത്ര ചെയ്യുമ്പോഴും മുഴുവൻ തുകയും യാത്രക്കാർ നൽകേണ്ടി വരും.
യാത്രക്കാരുടെ സൗകര്യം കണക്കിലെടുത്ത് റിസർവേഷൻ സംവിധാനം പരിഷ്കരിക്കുന്നതിൻ്റെ ഭാഗമായാണ് ഇത്തരമൊരു നീക്കമെന്ന് "ടൈംസ് ഓഫ് ഇന്ത്യ' റിപ്പോർട്ട് ചെയ്തു. ബെർത്ത് പൂർണമായും ലഭിക്കാത്ത സാഹചര്യത്തിൽ, യാത്രക്കാരിൽ നിന്ന് മുഴുവൻ നിരക്ക് ഈടാക്കുന്നത് ഉചിതമല്ലെന്ന വാദം ഉയർന്നിട്ടുണ്ടെന്ന് ഉന്നത ഉദ്യോഗസ്ഥർ പറഞ്ഞതായി റിപ്പോർട്ടിലുണ്ട്.
ഒരേ സീറ്റ് പുരുഷനും സ്ത്രീക്കുമായി അനുവദിക്കപ്പെടുന്ന സാഹചര്യത്തിൽ ആർഎസി സംവിധാനം യാത്രക്കാർക്ക് വലിയ അസൗകര്യമുണ്ടാക്കുന്നതായി പരാതി ഉയർന്നിരുന്നു. പകരം സീറ്റ് കണ്ടെത്താൻ ട്രെയിൻ ടിക്കറ്റ് എക്സാമിനർമാരും (ടിടിഐ) വലിയ പ്രയാസം നേരിടുന്നുണ്ട്. ആർഎസി ടിക്കറ്റുള്ള യാത്രക്കാരിൽനിന്ന് മുഴുവൻ നിരക്കും ഈടാക്കുന്ന വിഷയം പാർലമെൻ്ററി സമിതിയും നേരത്തെ ചൂണ്ടിക്കാട്ടിയിരുന്നു. നിരക്ക് ഈടാക്കുന്നില്ലെന്ന് ഉറപ്പാക്കാൻ നിലവിലെ സംവിധാനം പുനഃപരിശോധിക്കണമെന്നു സമിതി ശുപാർശ ചെയ്തു.