ഇന്ത്യൻ സിനിമയിലെ സകലകലാവല്ലഭൻ കമൽഹാസന് ഇന്ന് എഴുപത്തിരണ്ടാം പിറന്നാൾ. ആറാം വയസ്സിൽ ബാലതാരമായി തുടങ്ങി ആറു ദശാബ്ദത്തിലേറെ ഇന്ത്യൻ സിനിമകളിൽ വിവിധ മേഖലകളിൽ നിറഞ്ഞുനിന്ന മറ്റൊരു താരം വേറെയില്ല.
സിനിമയുടെ സമസ്തമേഖലകളിലും കൈയൊപ്പു പതിപ്പിച്ചു ഉലകനായകൻ. അഭിനേതാവ് എന്നതിലുപരിയായി തിരക്കഥാകൃത്തായും സംവിധായകനായും ഗാനരചയിതാവായും ഗായകനായും സംവിധായകനായും നിർമാതാവായും കമൽ ഹാസൻ തിളങ്ങി. ആറാം വയസ്സിൽ കളത്തൂർ കണ്ണമ്മയിൽ ബാലതാരമായിട്ടായിരുന്നു തുടക്കം. മികച്ച ബാലതാരത്തിനുള്ള രാഷ്ട്രപതിയുടെ സ്വർണ്ണ മെഡൽ ഭാവി താരത്തിൻ്റെ വരവറിയിച്ചു. അസാധാരണമായ നടനവൈഭവം, മികച്ച നർത്തകൻ, ആക്ഷൻ രംഗങ്ങളിലെ കൃത്യത... അങ്ങനയങ്ങനെ കമൽഹാസനെ വേറിട്ടുനിർത്തുന്ന ഘടകങ്ങൾ ഒട്ടേറെയുണ്ട്.അഭിനയസാഗരത്തിൽ അലിഞ്ഞുചേർന്ന പ്രതിഭയാണ് കമൽ ഹാസൻ. ഗുണയും അവൈ ഷൺമുഖിയും ഇന്ത്യനും ദശാവതാരവും വിശ്വരൂപവും അങ്ങനെ എത്രയെത്ര വൈവിധ്യമായ കഥാപാത്രങ്ങൾ.
നായകൻ, മൂന്നാം പിറൈ, തേവർ മകൻ, അൻപേ ശിവം, വിക്രം, ഇന്ത്യൻ, പാപനാശം, കൽക്കി, മൈക്കിൾ മദന കാമരാജൻ, പുഷ്പക വിമാന, ദശാവതാരം, വറുമയിൻ നിറം സിവപ്പ്, സാഗര സംഗമം, മദനോത്സവം തുടങ്ങിയ ചിത്രങ്ങൾ കമൽഹാസനെന്ന പ്രതിഭയെ നമ്മുക്ക് കാട്ടിത്തരുന്നുണ്ട്. സിനിമയോടുള്ള അടങ്ങാത്ത പ്രണയത്തോടെ ഉലകനായകനായി കമൽഹാസൻ ഇനിയും നിരവധി പതിറ്റാണ്ടുകൾ തുടരണമെന്നാണ് ആരാധകരുടെ പ്രാർഥന.