ഇനി ആരുവിളിച്ചാലും ഫോണിൽ പേര് തെളിയും; പുതിയ സംവിധാനവുമായി ടെലികോം മേഖല
ഫോണിൽ സേവ് ചെയ്യാത്ത നമ്പറിൽനിന്ന് കോൾ വന്നാലും വിളിക്കുന്നയാളുടെ പേര് സ്ക്രീനിൽ തെളിയിക്കുന്ന സംവിധാനത്തിന് രാജ്യത്ത് വഴിയൊരുങ്ങുന്നു. ഇതോടെ അജ്ഞാത നമ്പറുകളിൽനിന്നുള്ള കോളുകൾ ആരുടേതാണെന്ന് തിരിച്ചറിയാൻ ഉപഭോക്താക്കൾക്ക് സാധിക്കും.
കോൾ ചെയ്യുന്നയാളുടെ പേര് തിരിച്ചറിയുന്നതിനുള്ള സംവിധാനമായ CNAP (Calling Name Presentation) നടപ്പാക്കുന്നതിന്റെ ഭാഗമായാണ് ഈ നീക്കം. തട്ടിപ്പ് കോളുകൾ, വ്യാജ തിരിച്ചറിയലുകൾ, അനാവശ്യ കോളുകൾ എന്നിവ നിയന്ത്രിക്കുകയാണ് പ്രധാന ലക്ഷ്യം.
4G, 5G ഉപഭോക്താക്കൾക്ക് ആദ്യം
നവംബർ ഒന്ന് മുതൽ രാജ്യത്തെ 4G, 5G നെറ്റ്വർക്കുകളിൽ ഈ സംവിധാനം നടപ്പാക്കാനാണ് ടെലികോം വകുപ്പിന്റെ നിർദേശം. ഇതിനായി പ്രത്യേക ആപ്പോ ഡൗൺലോഡോ ചെയ്യേണ്ടതില്ല. ടെലികോം കമ്പനികൾ സ്വമേധയാ സേവനം ലഭ്യമാക്കണം.
നിലവിൽ ഫോണിൽ സേവ് ചെയ്യാത്ത ഇന്ത്യൻ നമ്പറുകളിൽനിന്നുള്ള കോളുകൾ വരുമ്പോൾ ടെലികോം കമ്പനിയുടെ ഉപഭോക്തൃ രേഖകളിലുള്ള പേരാണ് തെളിയുക. വിദേശത്തുനിന്നുള്ള കോളുകൾ 'International Call' എന്നായിരിക്കും കാണിക്കുക. 2G, 3G, ലാൻഡ്ലൈൻ ഉപയോക്താക്കൾക്ക് ഈ സംവിധാനം പിന്നീട് പരിഗണിക്കും.
സ്വകാര്യത ഉറപ്പാക്കുന്നതിനുള്ള വ്യവസ്ഥകളും പുതിയ സംവിധാനത്തിലുണ്ട്.