മുട്ടം: റോഡിലെ കുഴിയിൽ ബൈക്ക് വീണ് യാത്രികന്റെ കാൽ ഒടിഞ്ഞ സംഭവത്തിൽ പ്രതിഷേധം ശക്തമായതോടെ അധികൃതർ കുഴി താൽക്കാലികമായി അടച്ചു. മുട്ടം ഏക്കലയിൽ റോഡിലെ കുഴികൾ യാത്രക്കാർക്ക് ഭീഷണിയാകുമ്പോഴും ശാശ്വത പരിഹാരം ഉണ്ടാകാത്തതിൽ പ്രദേശവാസികൾക്കിടയിൽ പ്രതിഷേധം ശക്തമാണ്.
കെഎസ്ബിയുടെ നേതൃത്വത്തിൽ കുഴികൾ അടച്ച് ടാറിങ് നടത്തിയെങ്കിലും വാട്ടർ അതോറിറ്റിയുടെ അനാസ്ഥ മൂലം റോഡിന്റെ പല ഭാഗങ്ങളിലും അപകടാവസ്ഥ തുടരുകയാണ്. കുടിവെള്ള വിതരണത്തിനും അനുബന്ധ ജോലികൾക്കുമായി എടുത്ത കുഴികൾ കൃത്യമായി മൂടാത്തതാണ് യാത്രാദുരിതം രൂക്ഷമാക്കുന്നത്.
മലങ്കര പാർക്ക് മുതൽ കോടതി കവല വരെയുള്ള റോഡിലാണ് അപകടസാധ്യത കൂടുതലുള്ളത്. മാസങ്ങൾക്കുമുമ്പ് പൈപ്പുകൾ സ്ഥാപിക്കുന്നതിനായി റോഡ് വെട്ടിപ്പൊളിച്ചിരുന്നു. എന്നാൽ പൈപ്പുകൾ സ്ഥാപിച്ചശേഷം റോഡ് പൂർണമായി പൂർവസ്ഥിതിയിലാക്കാത്തതിനാൽ വലിയ കുഴികൾ രൂപപ്പെട്ടു. ഇതോടെ ഇരുചക്രവാഹന യാത്രികർ ഉൾപ്പെടെയുള്ളവർ അപകടഭീഷണിയിലാണ്.
ശബരിമല തീർഥാടനകാലം ആരംഭിക്കുന്നതോടെ ഇതുവഴിയുള്ള വാഹനങ്ങളുടെ തിരക്ക് വർധിക്കാനുള്ള സാധ്യതയുമുണ്ട്. റോഡിന്റെ ശോച്യാവസ്ഥ തുടർന്നാൽ കൂടുതൽ അപകടങ്ങൾ സംഭവിക്കുമെന്ന ആശങ്കയിലാണ് നാട്ടുകാർ.
മലങ്കര പാർക്ക് മുതൽ കോടതി കവല വരെയുള്ള റോഡ് അടിയന്തരമായി റീടാറിങ് നടത്തി ഗതാഗതയോഗ്യമാക്കണമെന്നും പൈപ്പിടൽ ജോലികൾക്കായി കുഴിച്ച ഭാഗങ്ങൾ ശാസ്ത്രീയമായി പുനർനിർമിക്കണമെന്നും പ്രദേശവാസികൾ ആവശ്യപ്പെട്ടു. താൽക്കാലികമായി കുഴികൾ അടയ്ക്കുന്നതിനു പകരം ബന്ധപ്പെട്ട അധികൃതർ അടിയന്തരമായി ഇടപെട്ട് ശാശ്വത പരിഹാരം കാണണമെന്നാണ് നാട്ടുകാരുടെ ആവശ്യം.