മൂന്നാറിലെ മീശപ്പുലിമലയിൽ നീലക്കുറിഞ്ഞി പൂക്കൾ കാണുന്നതിനുള്ള സന്ദർശനം ആരംഭിച്ചു. കേരള ഫോറസ്റ്റ് ഡവലപ്മെന്റ് കോർപറേഷന്റെ (കെഎഫ്ഡിസി) നേതൃത്വത്തിലാണ് സഞ്ചാരികൾക്കായി ഈ സൗകര്യം ഒരുക്കിയിരിക്കുന്നത്. മൂന്നാറിലെ സൈലന്റ് വാലി റോഡിലുള്ള കെഎഫ്ഡിസി ഓഫീസിന് സമീപത്തുനിന്നും ജീപ്പിൽ റോഡോ മാൻഷൻ വരെ സഞ്ചാരികളെ എത്തിക്കും. അവിടെനിന്ന് നടന്ന് കുറിഞ്ഞിപ്പൂക്കൾ കാണാം. പൂക്കൾ സംരക്ഷിക്കുന്നതിന്റെ ഭാഗമായി സന്ദർശന സ്ഥലങ്ങൾ വേലി കെട്ടി തിരിച്ചിട്ടുണ്ട്. കുറിഞ്ഞിക്കൊപ്പം വരയാടുകളെയും ഇവിടെ കാണാൻ സാധിക്കും. 1,416 രൂപയാണ് യാത്രാക്കൂലി ഉൾപ്പെടെയുള്ള നിരക്ക്. ‘കുറിഞ്ഞി’ ആപ്പ് വഴി ടിക്കറ്റുകൾ ബുക്ക് ചെയ്യാം. ഒരു ദിവസം 750 പേർക്ക് മാത്രമാണ് പ്രവേശനം.
ഇതോടൊപ്പം മൂന്നാർ – വട്ടവട റൂട്ടിലെ പ്രധാന ആകർഷണമായ മാട്ടുപ്പെട്ടിയിലെ പുൽമേടുകളും സഞ്ചാരികൾക്കായി തുറന്നുകൊടുത്തിട്ടുണ്ട്. കേരള ലൈവ് സ്റ്റോക്ക് ഡവലപ്മെന്റ് ബോർഡിന്റെ ഉടമസ്ഥതയിലുള്ള മാട്ടുപ്പെട്ടി ഡാമിന്റെ വൃഷ്ടിപ്രദേശത്തുള്ള മൊട്ടക്കുന്നുകളും പ്രത്യേകം പരിപാലിക്കുന്ന പുൽമേടുകളുമാണ് സന്ദർശകർക്കായി ഒരുക്കിയിരിക്കുന്നത്. 14 മുതൽ 16 വരെയുള്ള ഫീൽഡുകളിൽ ഉൾപ്പെടുന്ന 15-ാം നമ്പർ പുൽമേടാണ് നിലവിൽ തുറന്നിട്ടുള്ളത്. രാവിലെ 8 മുതൽ വൈകിട്ട് 5.30 വരെയാണ് സന്ദർശന സമയം.
ഈ പുൽമേടുകളിൽ മേയാനെത്തുന്ന കാട്ടാനകൾ സഞ്ചാരികളുടെ മുഖ്യ ആകർഷണമാണ്. എന്നാൽ ആനകളുടെ സ്വൈരവിഹാരത്തിന് തടസ്സമുണ്ടാക്കാത്ത രീതിയിലുള്ള സുരക്ഷാ ക്രമീകരണങ്ങളാണ് ഏർപ്പെടുത്തിയിരിക്കുന്നത്. ആനകളുടെ സാന്നിധ്യം ഉണ്ടായാൽ സന്ദർശകരെ പെട്ടെന്ന് മാറ്റാൻ പ്രത്യേക കാവൽക്കാരെയും ചുമതലപ്പെടുത്തിയിട്ടുണ്ട്. മുതിർന്നവർക്ക് 50 രൂപയും 12 വയസ്സിൽ താഴെയുള്ള കുട്ടികൾക്ക് 25 രൂപയുമാണ് പ്രവേശന ഫീസ്. പുൽമേടുകളുടെ സംരക്ഷണ ചെലവുകൾ കണ്ടെത്തുന്നതിനും സർക്കാരിന്റെ നിർദ്ദേശപ്രകാരവുമാണ് ഈ പുതിയ ടൂറിസം പദ്ധതി ആരംഭിച്ചിരിക്കുന്നത്.