കാലിത്തീറ്റയുടെ വിലയിലുണ്ടാകുന്ന തുടർച്ചയായ വർധന ക്ഷീരകർഷകരെ കടുത്ത പ്രതിസന്ധിയിലാക്കുന്നു. ഉൽപ്പാദനച്ചെലവ് കുത്തനെ ഉയരുമ്പോഴും പാലിന് ലഭിക്കുന്ന വിലയിൽ ആനുപാതികമായ വർധനയില്ലാത്തത് കർഷകരുടെ വരുമാനത്തെ പ്രതികൂലമായി ബാധിക്കുന്നു. ഇതോടെ ക്ഷീരമേഖലയിൽ പിടിച്ചുനിൽക്കാനാകാതെ നിരവധി കർഷകർ പശുവളർത്തൽ ഉപേക്ഷിക്കേണ്ട സാഹചര്യത്തിലാണ്.
ഇത് കൂടാതെ കാലാവസ്ഥാ വ്യതിയാനം പശുക്കളുടെ ആരോഗ്യത്തെ തന്നെ കാര്യമായി ബാധിക്കുന്നു. അമിതമായ അന്തീരക്ഷ ഊഷ്മാവ് മൂലം, മൃഗങ്ങളുടെ ശരീര ഊഷ്മാവ് താഴ്ന്ന നിലയിൽ നില നിർത്തുന്നതിനായി സ്പ്രിങ്ക്ലെർ, ഫാൻ മുതലായവ ഉപയോഗിക്കുന്നത് മൂലം അധിക ചെലവ് വരുന്നതായും കൃഷിക്കാർ പരാതിപ്പെടുന്നു.
കാലിത്തീറ്റ, വൈക്കോൽ, പിണ്ണാക്ക് തുടങ്ങിയവയുടെ വിലവർധനയ്ക്കൊപ്പം പശുക്കളുടെ പരിപാലനച്ചെലവും ചികിത്സാചെലവും വർധിച്ചുവരികയാണ്. ഒരു പശുവിനെ വളർത്തുന്നതിനുള്ള പ്രതിദിന ചെലവ് പോലും താങ്ങാനാകാത്ത അവസ്ഥയിലാണെന്ന് കർഷകർ പറയുന്നു. പാൽ ഉൽപ്പാദനത്തിൽ നിന്നുള്ള വരുമാനത്തിന്റെ വലിയൊരു പങ്കും തീറ്റയ്ക്കും പരിപാലനത്തിനുമായി ചെലവഴിക്കേണ്ടിവരുന്നു.
ചെറുകിട ക്ഷീരകർഷകരെയാണ് വിലവർധന ഏറ്റവും കൂടുതൽ ബാധിക്കുന്നത്. കടം വാങ്ങിയും വായ്പയെടുത്തും പശുവളർത്തൽ നടത്തുന്നവർക്ക് നിലവിലെ സാഹചര്യത്തിൽ മുന്നോട്ടുപോകുക പ്രയാസകരമാണ്. പലരും പശുക്കളെ വിൽക്കുകയും ക്ഷീരമേഖലയിൽനിന്ന് പിന്മാറുകയും ചെയ്യുന്നു.
കാലിത്തീറ്റയുടെ വില നിയന്ത്രിക്കുന്നതിനും സബ്സിഡി നിരക്കിൽ ഗുണമേന്മയുള്ള കാലിത്തീറ്റ ലഭ്യമാക്കുന്നതിനും സർക്കാർ അടിയന്തര നടപടി സ്വീകരിക്കണമെന്നാണ് ക്ഷീരകർഷകരുടെ ആവശ്യം. പാൽവിലയും ഉൽപ്പാദനച്ചെലവും തമ്മിൽ നീതിപൂർവമായ അനുപാതം ഉറപ്പാക്കണമെന്നും കർഷകർ ആവശ്യപ്പെടുന്നു.
ക്ഷീരമേഖലയെ ആശ്രയിച്ച് ഉപജീവനം നടത്തുന്ന ആയിരക്കണക്കിന് കുടുംബങ്ങളുടെ നിലനിൽപ്പുതന്നെ ചോദ്യം ചെയ്യപ്പെടുന്ന സാഹചര്യത്തിൽ, സർക്കാർ അടിയന്തരമായി ഇടപെട്ടില്ലെങ്കിൽ ക്ഷീരമേഖലയിൽനിന്നുള്ള കർഷകരുടെ കൊഴിഞ്ഞുപോക്ക് ഇനിയും വർധിക്കുമെന്ന ആശങ്ക ശക്തമാണ്.