തിരുവനന്തപുരം: സംസ്ഥാനത്തെ പ്രത്യേക സംക്ഷിപ്ത വോട്ടർ പട്ടിക പുതുക്കലിന്റെ (Special Summary Revision – SSR 2027) ഭാഗമായി കരട് വോട്ടർ പട്ടിക പ്രസിദ്ധീകരിച്ചു. പട്ടികയിൽ ഉൾപ്പെട്ട വിവരങ്ങൾ പരിശോധിച്ച് പരാതികളും ആക്ഷേപങ്ങളും സമർപ്പിക്കുന്നതിനും പുതിയ പേരുകൾ ചേർക്കുന്നതിനും നിലവിലുള്ള വിവരങ്ങളിൽ തിരുത്തലുകൾ വരുത്തുന്നതിനും ഡിസംബർ 11 വരെ അവസരം ലഭിക്കും.
കരട് പട്ടികയിൽ ആകെ 2,73,60,254 വോട്ടർമാരാണുള്ളത്. ഇതിൽ 1,40,38,718 സ്ത്രീകളും 1,33,21,267 പുരുഷന്മാരുമുണ്ട്. 269 ട്രാൻസ്ജെൻഡർ വോട്ടർമാരും പട്ടികയിൽ ഇടംപിടിച്ചിട്ടുണ്ട്.
18–19 പ്രായപരിധിയിലുള്ള 2,70,675 വോട്ടർമാരും 20–29 പ്രായപരിധിയിലുള്ള 44,06,424 വോട്ടർമാരും പട്ടികയിലുണ്ട്. 2,45,883 പ്രവാസി വോട്ടർമാരും കരട് പട്ടികയിൽ ഉൾപ്പെട്ടിട്ടുണ്ട്.
പേര് പരിശോധിക്കാം, തിരുത്തലുകൾ വരുത്താം
വോട്ടർ പട്ടികയിൽ പേര് ഉൾപ്പെട്ടിട്ടുണ്ടോയെന്നും വ്യക്തിഗത വിവരങ്ങൾ കൃത്യമാണോയെന്നും ഓരോ വോട്ടറും പരിശോധിക്കണമെന്ന് മുഖ്യ തിരഞ്ഞെടുപ്പ് ഓഫീസർ ഡോ. ഡി. സജിത് ബാബു അറിയിച്ചു. പേര് ഉൾപ്പെടാത്തവർക്ക് പുതുതായി പേര് ചേർക്കുന്നതിനും പേരിലോ മറ്റ് വിവരങ്ങളിലോ തെറ്റുകളുണ്ടെങ്കിൽ തിരുത്തുന്നതിനും നിശ്ചിത സമയത്തിനുള്ളിൽ അപേക്ഷ നൽകാം.
കരട് വോട്ടർ പട്ടിക ഇലക്ടറൽ രജിസ്ട്രേഷൻ ഓഫീസർമാരുടെ കാര്യാലയങ്ങൾ, ജില്ലാ കളക്ടറേറ്റുകൾ, ബൂത്ത് ലെവൽ ഓഫീസർമാർ (BLO) എന്നിവിടങ്ങളിൽ ലഭ്യമാണ്. കൂടാതെ മുഖ്യ തിരഞ്ഞെടുപ്പ് ഓഫീസറുടെ ഔദ്യോഗിക വെബ്സൈറ്റായ www.ceo.kerala.gov.in വഴിയും പട്ടിക പരിശോധിക്കാം.
പ്രധാന തീയതികൾ
- കരട് വോട്ടർ പട്ടിക പ്രസിദ്ധീകരിച്ചത്: നവംബർ 12, 2026
- പരാതികളും അവകാശവാദങ്ങളും സമർപ്പിക്കാനുള്ള അവസാന തീയതി: ഡിസംബർ 11, 2026
- പരാതികളിലും ആക്ഷേപങ്ങളിലും തീർപ്പാക്കേണ്ടത്: ഡിസംബർ 28-നകം
- അന്തിമ വോട്ടർ പട്ടിക പ്രസിദ്ധീകരിക്കുന്നത്: 2027 ജനുവരി 4
2027 ജനുവരി ഒന്നാണ് ഈ പുതുക്കൽ നടപടിയുടെ യോഗ്യതാ തീയതി. അർഹരായ ഒരു വോട്ടറുടെയും പേര് പട്ടികയിൽ നിന്ന് വിട്ടുപോകാതിരിക്കാനും തെറ്റായ വിവരങ്ങൾ തിരുത്തി കുറ്റമറ്റ വോട്ടർ പട്ടിക ഉറപ്പാക്കാനുമാണ് തിരഞ്ഞെടുപ്പ് കമ്മീഷന്റെ നടപടി. അതിനാൽ എല്ലാ വോട്ടർമാരും കരട് പട്ടിക പരിശോധിച്ച് ആവശ്യമായ നടപടികൾ ഡിസംബർ 11-നകം പൂർത്തിയാക്കണം