കോലാനി Marvel മെത്ത ഫാക്ടറിയിൽ തീപിടിത്തം; വൻ നാശനഷ്ടം
തൊടുപുഴ കോലാനിയിൽ Marvel Mattress Factoryയിൽ വൻ തീപിടിത്തം. ഇന്ന് രാവിലെ ഏകദേശം 9.30ഓടെയാണ് ഫാക്ടറിയിൽ തീപിടിത്തമുണ്ടായത്. ഫാക്ടറിയിൽ നിന്ന് പുക ഉയരുന്നത് ശ്രദ്ധയിൽപ്പെട്ട തൊഴിലാളികൾ അധികൃതരെ വിവരം അറിയിക്കുകയായിരുന്നു.
തുടർന്ന് തീ ഫാക്ടറിയുടെ വിവിധ ഭാഗങ്ങളിലേക്ക് പടരുകയായിരുന്നു. തൊടുപുഴ ഫയർ ആൻഡ് റെസ്ക്യൂ സ്റ്റേഷനിൽ നിന്നുള്ള യൂണിറ്റുകൾ സ്ഥലത്തെത്തി തീയണയ്ക്കാനുള്ള ശ്രമം ആരംഭിച്ചു. തീ നിയന്ത്രണവിധേയമാക്കാൻ കഴിയാതെ വന്നതോടെ കോതമംഗലം ഫയർ സ്റ്റേഷനിൽ നിന്നുള്ള സഹായവും തേടി. ഒന്നര മണിക്കൂറിലേറെ നീണ്ട പരിശ്രമത്തിനൊടുവിലാണ് തീ നിയന്ത്രണവിധേയമാക്കിയത്.
ഫാക്ടറിയിൽ സൂക്ഷിച്ചിരുന്ന വലിയ തോതിലുള്ള മെത്ത ഫോമും യന്ത്രസാമഗ്രികളും കത്തിനശിച്ചതായി ഫയർഫോഴ്സ് അധികൃതർ അറിയിച്ചു. അസംസ്കൃത വസ്തുക്കളും യന്ത്രങ്ങളും ഉൾപ്പെടെ നിരവധി കോടികളുടെ നാശനഷ്ടം ഉണ്ടായതായാണ് പ്രാഥമിക വിലയിരുത്തൽ.
ഞായറാഴ്ച അവധിയായിരുന്നതിനാൽ ഫാക്ടറിയിൽ ജീവനക്കാരുണ്ടായിരുന്നില്ല. ഇതോടെ ആളപായം ഒഴിവായി. തീപിടിത്തത്തിന്റെ കൃത്യമായ കാരണം വ്യക്തമല്ലെങ്കിലും ഷോർട്ട് സർക്യൂട്ടാണ് പ്രാഥമിക സംശയം. സംഭവത്തിൽ കൂടുതൽ പരിശോധനകൾ നടന്നുവരികയാണ്.
Photo courtesy : manorama online
