തമിഴ്നാട്ടിലെ വാൽപ്പാറയിൽ ശക്തമായ മഴയെ തുടർന്ന് പൊള്ളാച്ചി–വാൽപ്പാറ റോഡിൽ വൻ പാറ അടർന്നുവീണ് ഗതാഗതം തടസ്സപ്പെട്ടു. രണ്ടാം ഹെയർപിൻ വളവിന് സമീപമാണ് റോഡിന്റെ ഒരുവശം തകർന്നത്. ഇതോടെ ഈ വഴിയിലൂടെയുള്ള വാഹനഗതാഗതം പ്രതിസന്ധിയിലായി.
കേരളത്തിലും തുലാവർഷം ശക്തിപ്രാപിച്ചതോടെ വിവിധ ജില്ലകളിൽ കനത്ത മഴയും വെള്ളക്കെട്ടും റിപ്പോർട്ട് ചെയ്തു. തിരുവനന്തപുരം, കൊല്ലം ജില്ലകളിലാണ് കഴിഞ്ഞ ദിവസം മഴ കൂടുതൽ നാശനഷ്ടങ്ങളുണ്ടാക്കിയത്. മലയോര മേഖലകളിൽ ശക്തമായ മഴ തുടരുന്നതിനിടെ നദികളിലും ജലനിരപ്പ് ഉയർന്നു.
തിരുവനന്തപുരം ജില്ലയിൽ വിതുര, പൊന്മുടി തുടങ്ങിയ പ്രദേശങ്ങളിൽ ശക്തമായ മഴയാണ് ലഭിച്ചത്. വിതുരയിൽ റോഡുകളിൽ വെള്ളം കയറിയതോടെ യാത്രയും ദുരിതത്തിലായി. വാമനപുരം നദിയിൽ ജലനിരപ്പ് ഉയർന്നപ്പോൾ മക്കിയാർ കരകവിഞ്ഞൊഴുകി. പേപ്പാറ, ആനപ്പാറ മേഖലകളിലെ വീടുകളിലും വെള്ളം കയറി. ജലനിരപ്പ് ഉയരുന്ന സാഹചര്യത്തിൽ അരുവിക്കര ഡാമിന്റെ ഷട്ടറുകൾ കൂടുതൽ ഉയർത്താനും തീരുമാനിച്ചിട്ടുണ്ട്.
കൊല്ലം ജില്ലയിലും മഴ വ്യാപകമായി ബാധിച്ചു. ചാത്തന്നൂരിൽ സർവീസ് സഹകരണ ബാങ്കിന് മുന്നിലെ സർവീസ് റോഡിൽ വെള്ളം കയറിയതോടെ കാർ പകുതിയോളം മുങ്ങി. സമീപത്തെ വ്യാപാര സ്ഥാപനങ്ങളിലും വെള്ളം കയറി. ദേശീയപാത 66-ൽ പലയിടത്തും വെള്ളക്കെട്ട് രൂക്ഷമാണ്. കരുനാഗപ്പള്ളി, കുണ്ടറ മേഖലകളിലും ശക്തമായ മഴ ലഭിച്ചു.
അതിനിടെ, എഴുകോൺ പുതുശ്ശേരിക്കോണം സ്വദേശി ശ്യാം തോമസിന് രാത്രിയിലുണ്ടായ ഇടിമിന്നലിൽ പൊള്ളലേറ്റു. അടുക്കളയിൽ നിൽക്കുന്നതിനിടെയാണ് യുവാവിന് മിന്നലേറ്റത്. മിന്നലിന്റെ ആഘാതത്തിൽ അടുക്കളയിലെ സ്ലാബ് തകരുകയും വീട്ടിലെ ഫ്രിഡ്ജ് കത്തിനശിക്കുകയും ചെയ്തു.
പത്ത് ജില്ലകളിൽ യെല്ലോ അലർട്ട്
സംസ്ഥാനത്ത് തുലാവർഷം ശക്തമാകുന്ന സാഹചര്യത്തിൽ ഇന്ന് പത്ത് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം ജില്ലകളിലാണ് മുന്നറിയിപ്പ്. കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി ജില്ലകളിൽ ശക്തമായ മഴയ്ക്കും ഒറ്റപ്പെട്ടയിടങ്ങളിൽ അതിശക്തമായ മഴയ്ക്കും സാധ്യതയുണ്ടെന്നാണ് മുന്നറിയിപ്പ്.
ശനിയാഴ്ച വരെ കേരളത്തിൽ വ്യാപകമായി മഴ ലഭിക്കുമെന്നാണ് കാലാവസ്ഥാ പ്രവചനം. മഴ തുടരുന്ന സാഹചര്യത്തിൽ മലയോര മേഖലകളിലുള്ളവരും വെള്ളക്കെട്ടിനും വെള്ളപ്പൊക്കത്തിനും സാധ്യതയുള്ള പ്രദേശങ്ങളിൽ താമസിക്കുന്നവരും ജാഗ്രത പാലിക്കണമെന്ന് അധികൃതർ നിർദേശിച്ചു.