നിലമ്പൂർ: മലപ്പുറം ജില്ലയിലെ നിലമ്പൂർ അമരമ്പലം മേഖലയിലെ കോട്ടപ്പുഴയിൽ ഉണ്ടായ ശക്തമായ മലവെള്ളപ്പാച്ചിലിൽ രണ്ട് പേർ മരിച്ചു. നാല് പേരെ കാണാതായതായി റിപ്പോർട്ട്. ഞായറാഴ്ച വൈകിട്ട് അഞ്ചരയോടെയാണ് ടികെ കോളനി മേഖലയ്ക്ക് സമീപം അപ്രതീക്ഷിതമായി പുഴയിൽ ജലനിരപ്പ് ഉയർന്നത്.
തിരൂർ സ്വദേശിയും സ്വകാര്യ ബസ് ജീവനക്കാരനുമായ മാങ്ങാടൻ അനസ് (27) ഉൾപ്പെടെ രണ്ട് പേരുടെ മൃതദേഹങ്ങൾ കണ്ടെത്തി. കാണാതായവരിൽ കരുവാരക്കുണ്ട് സ്വദേശി റഹീം (35), വണ്ടൂർ സ്വദേശിയായ സജ്ജാദ്, ചെറ്റിയാർഅമ്മൽ കുറുപ്പത്ത് റഫീഖ് (41), ടികെ കോളനി സ്വദേശിനി സജിത (26) എന്നിവരുണ്ടെന്നാണ് പ്രാഥമിക വിവരം.
പ്രദേശത്ത് വലിയ മഴയില്ലാതിരുന്ന സമയത്താണ് മലവെള്ളപ്പാച്ചിൽ ഉണ്ടായത്. എന്നാൽ ഉൾവന മേഖലയിൽ ശക്തമായ മഴ പെയ്തതിനെ തുടർന്ന് പുഴയിൽ പെട്ടെന്ന് ജലനിരപ്പ് ഉയരുകയായിരുന്നു. അവധി ദിവസമായതിനാൽ നിരവധി പേർ പുഴയിലും പരിസരത്തും ഉണ്ടായിരുന്നത് രക്ഷാപ്രവർത്തനം കൂടുതൽ ദുഷ്കരമാക്കി. നാട്ടുകാരും രക്ഷാപ്രവർത്തകരും ചേർന്ന് നിരവധി പേരെ സുരക്ഷിതമായി കരയിലെത്തിച്ചു.
രാത്രിയിൽ പ്രതികൂല കാലാവസ്ഥയെ തുടർന്ന് നിർത്തിവച്ച തിരച്ചിൽ തിങ്കളാഴ്ച രാവിലെ പുനരാരംഭിച്ചു. ഫയർ ആൻഡ് റെസ്ക്യൂ, ദേശീയ ദുരന്തനിവാരണ സേന, പൊലീസ്, നാട്ടുകാർ എന്നിവർ സംയുക്തമായാണ് തിരച്ചിൽ നടത്തുന്നത്. സംഭവത്തിന്റെ പശ്ചാത്തലത്തിൽ നിലമ്പൂർ–അമരമ്പലം മേഖലയിൽ പ്രത്യേക ദുരന്തനിവാരണ സേനയെ വിന്യസിക്കാൻ മുഖ്യമന്ത്രിയുടെ ഓഫീസ് നിർദേശം നൽകി.
സംസ്ഥാനത്ത് മഴ ശക്തമായ സാഹചര്യത്തിൽ അധികൃതർ ജാഗ്രതാ നിർദേശങ്ങൾ പുറപ്പെടുവിച്ചിട്ടുണ്ട്. പുഴകൾ, തോടുകൾ, വെള്ളച്ചാട്ടങ്ങൾ തുടങ്ങിയ അപകടസാധ്യതയുള്ള പ്രദേശങ്ങളിലേക്ക് ആളുകൾ പോകരുതെന്നും മുന്നറിയിപ്പുകൾ കർശനമായി പാലിക്കണമെന്നും അധികൃതർ ആവശ്യപ്പെട്ടു.
